IV Uşaq Kitab Festivalının açılışı mərasimi keçirildi

Aprelin 10-u Bakı İdman Sarayında IV Uşaq Kitab Festivalının açılış mərasimi keçirilib.

“Azərbaycan Nəşriyyatlar Assosiasiyası” İctimai Birliyindən Senet.az-a verilən məlumata görə, açılış mərasimində sözügedən qurumun sədri Şəmil Sadiq, Ailə, Qadın və Uşaq Problemləri üzrə Dövlət Komitəsinin rəhbəri Bahar Muradova, deputatlar Elnarə Akimova və Mehriban Vəliyeva, Azərbaycan Yazıçılar Birliyinin katibi Elçin Hüseynbəyli, layihənin rəhbəri Fatimə Alxaz, Expressbankın ictimaiyyətlə əlaqələr üzrə nümayəndəsi Raziyə Axundzadə çıxış edib, bu kimi festivalların ölkə kitabçılığına verdiyi töhfələrdən söz açıblar.

Açılış mərasimindən sonra Ailə, Qadın və Uşaq Problemləri üzrə Dövlət Komitəsinin rəhbəri Bahar Muradova, Gənclər və İdman Nazirliyinin Tələbələrlə iş üzrə sektor müdiri Elnur Abdullayev, Mədəniyyət Nazirliyinin əməkdaşı Xəyal Məmmədov, Expressbankın ictimaiyyətlə əlaqələr üzrə nümayəndəsi Raziyə Axundzadə festivalın təşkilində göstərdikləri köməyə görə təltifnamə ilə mükafatlandırılıblar.

Qeyd edək ki, festivalın təşkilatçıları Mədəniyyət, Gənclər və İdman nazirlikləri, Ailə Qadın və Uşaq Problemləri üzrə Dövlət Komitəsi, ANAİB, sponsoru isə Expressbankdır.

30-dək tanınmış nəşriyyatın iştirak etdiyi festivalda tanınmış ədiblərin təqdimat mərasimləri, imza günləri, məşhurlarla görüşlər, şeir saatları, uşaqlar üçün nağıl və əyləncə saatları nəzərdə tutulub.

Əlavə məlumat üçün bildirək ki, festival 4 gün – aprelin 13-nə qədər davam edəcək.

Giriş sərbəstdir.