“Gül bağçası” – məktəbyaşlı uşaqlar üçün yeni nəşr

Azərbaycan Dövlət Tərcümə Mərkəzinin Tərcümə Agentliyi Xalq şairi Musa Yaqubun məktəbyaşlı uşaqlar üçün qələmə aldığı şeirlərin toplandığı “Gül bağçası” kitabını nəşr edib.

Mərkəzdən Senet.az-a verilən məlumata görə kitabda şairin “Xarıbülbül”, “Bənövşə”, “Lalə”, “Zanbaq”, “Nərgiz”, “Qərənfil” kimi ilk dəfə işıq üzü görən şeirləri rəngli illüstrasiyalarla təqdim olunur. Kitab məktəbyaşlı uşaqları Musa Yaqub yaradıcılığı ilə yaxından tanış etməklə yanaşı, dərsdənkənar mütaliə vəsaiti olaraq Vətənə, təbiətə, bitki aləminə sevgi və bağlılıq yaratması ilə diqqət çəkir.

Kitaba daxil edilən rəngli illüstrasiyaların müəllifi gənc rəssam Şəhla Feyziyeva, redaktoru Yaşar Əliyevdir.

Yeni nəşri yaxın günlərdə kitab evləri və mağazalardan əldə etmək olar.